Х.Бадамсүрэн Засгийн газрын тогтоолыг зөрчиж ТББ руу 5.2 сая төгрөг шилжүүлжээ

“Эрдэнэт үйлдвэр”-ийн Ерөнхий захирал Х.Бадамсүрэн ёстой л ханаж цадахаа мэддэггүй нэгэн аж. Охиныхоо сургалтын төлбөрийг Эрдэнэт үйлдвэрээр төлүүлж, 300 сая төгрөгөөр “Лексус-570” авч унасан гээд түүний тансаглалтай холбоотой баримт, фактууд өмнө нь хэвлэлээр хэдэнтээ гарч байсан. МАН-ын бүлгийн дарга Д.Тогтохсүрэн 2 жилийн өмнө “Засгийн газар Х.Бадамсүрэнд хариуцлага тооцно” гэж мэдэгдэж байсан ч үнэн хэрэгтээ хариуцлага хүлээлгэж чадаагүй.

Харин энэ 2 жилийн хугацаанд Х.Бадамсүрэн захирал төсвийн зардлыг хэмнэх Засгийн газрын тогтоолыг зөрчиж ЁСТОЙ ДААМ гарчээ. Тодруулбал цар тахлын үед тэмдэглэлт ой, урлагийн наадам, спортын уралдаан тэмцээн зэрэг арга хэмжээнд хөрөнгө зарцуулахыг Засгийн газраас хориглосон ч Х.Бадамсүрэн дээрх тогтоолыг үл тоожээ. Хуулиас давсан эрх мэдэлтэн гэдгээ тэрбээр дахин нотолж “Эрдэнэ үйлдвэр”-ийн данснаас 5.2 сая төгрөгийг “Монголын туялзуур сэлэмний холбоо” ТББ-руу шилжүүлсэн баримтыг та харж байна.

Х.Бадамсүрэн Засгийн газрын тогтоолыг зөрчиж ТББ-руу мөнгө шилжүүлсэн нь шалтгаантай. Учир нь түүний бага хүү Б.Бадрахжаргал Монголын туялзуур сэлэмний холбооны Удирдах зөвлөлд гишүүнээр ажиллаж байсан. Эцэг хүний хувиар хүүгийнхээ ажлыг дэмжих нь хүний ёс. Гэхдээ тэр мөнгө Х.Бадамсүрэнгийн халааснаас бус улсаа тэтгэдэг уулын баяжуулах Эрдэнэт үйлдвэрийн данснаас гарсанд асуудлыг гол нь байгаа юм.

Хөрөнгө мөнгөтэй, эрх мэдэлтэй хүмүүст хууль хэзээ үйлчилдэг болох вэ. Хүн биш хууль засаглана гэж амлаагүй билүү МАН-ынхаан!  

Г.Жүгдэр