Монгол залуусын оюуны бүтээл “Hulan 21 Plus” ухаалаг гар утас худалдаанд гарлаа

2021.09.21-ний өдөр Монгол Улсын хамгийн анхны ухаалаг гар утас “Hulan 21 Plus”-ийн албан ёсны нээлт боллоо.

“Эхлэл брэнд” ХХК-ийн хамт олон, хөрөнгө оруулагчид, бизнесийн хамтрагчид эх орондоо технологийн дэвшилтэт бүтээгдэхүүнийг үйлдвэрлэх зорилго дор нэгдэж Дэлхийн зах зээлд өрсөлдөхүйц хүчин чадал, үзүүлэлттэй “Hulan 21 Plus” ухаалаг гар утсыг бүтээжээ.

 -  “Hulan 21 Plus” Монгол Улсын хөгжлийн түүхэнд нэгэн шинэ хуудсыг нэмлээ  -

“Эхлэл брэнд” ХХК-ийн Ерөнхий захирал Ч.Батзаяа: Нээлтийн ажиллагаа их сайхан боллоо. Монголчууд  маань нэг үедээ бодоход Монгол брэндээ дэмждэг. Монгол брэндээ сонгодог болсон нь асар том урам зориг юм. Бид нар хэчнээн технологийн бүтээгдэхүүн хийсэн ч Монголчуудын дэмжлэг, хүлээн авалт ямар байх вэ гэдэг хамгийн чухал. Монгол түмнийхээ итгэлийг алдахгүй улам бүр хөгжүүлж ажиллана гэдгээ амлаж байна.  Монгол залуучуудын Монгол Улсын оюуны бүтээл “Hulan 21 Plus” ухаалаг гар утсанд шингэсэн. Бид утсандаа гадаадын түүхий эдийн хувийг 100 хувь биш 20:80 харьцаатай шингээж өгсөн нь давуу тал болсон. Дээр нь Дэлхийн зах зээлд хүлээн зөвшөөрөгдсөн лицензүүдийг албан ёсоор авч үнэ, үзүүлэлтийн хувьд хамгийн боломжийн байхаар гар утсаа бүтээсэн.

 “Том амжилт” ХХК-ийн Ерөнхий захирал Ж.Шижир: Маш их баяртай байна. Түүхэн үйл явдалд гэрч болон оролцож байгаадаа баяртай байна. Анх утас хийнэ гэдэг бол мөрөөдөл байсан. Монгол улсад гар утас хийж байсан туршлагатай зөвлөх, консалтинг өгөх газар байгаагүй. Бид нар өөрсдөө бүгдийг шинээр суралцаж, зохион байгуулж маш их бэрхшээлүүдийг даван туулж, товлосон хугацаандаа “Hulan 21 Plus” гар утсаа хэрэглэгчдэдээ амжилттай хүргэж чадлаа. 

- Монгол Улсын шигшээ багийн тамирчид “Hulan 21 Plus” гар утсаар гангарна -

Монгол Улсын гавьяат тамирчин М.Анхцэцэг: Монгол залуучууд чадлаа.  Эхлэл брэндийн залуус маань чадлаа гэж юуны түрүүнд хэлмээр байна. Хашхирмаар санагдаж байна. Эх орондоо үйлдвэрлэсэн Монгол утсаараа гангараад тэмцээн уралдаанд явах нь байна. Үнэхээр их баяртай байна. Та нар маань илүү олон зүйлийг эх орондоо хийж бүтээгээд, баялаг бүтээгчид нь байгаарай гэж хүсмээр байна. Монгол Улсын Үндэсний шигшээ багийн тамирчдад хүндэтгэл үзүүлж гар утасны дээжээ бэлэглэж байгаад маш их баярлалаа.

"Эмоци" продакшны захирал Д.Түвшинтөр: Монголын түүхэнд бас нэгэн шинэ хуудас нэмэгдэж байна. Өнөөдөр Монголчууд маань гар утас үйлдвэрлээд 2021.09.21-ний өдөр нээлтээ хийж байна. Миний хувьд сэтгэл өндөр байна. Монголчууд чаддаг юм байна. Хийж чаддаг, бүтээж чаддаг гэдгийг бүх Монголчууддаа дэлхийд харуулж чадлаа.  Утасны танилцуулгыг нэгд нэгэнгүй сайн харсан л даа. Үнэхээр дэлхийд өрсөлдөхүйц утас болжээ. Эхлэл брэндийнхээ бүх залуучуудынхаа ажилд амжилт хүсье. Араас нь дахиад машин бүтээнэ гэж байна шүү дээ. Тэгэхээр энэ залуучууд бүхнийг бүтээж чадна гэж би бодож байна.

“Баялаг бүтээгчдийг дэмжих холбоо”-ны Ерөнхийлөгч Ч.Даваабаяр: Монгол залуучууддаа тэр дундаа Ч.Батзаяа даа хамтран зүтгэгч бүх Монгол залуучууддаа амжилт хүсье. Ч.Батзаяа ажлын гараагаа манай компаниас эхлүүлж байсан. Манай компанид программист хийж байсан залуу маань БНХАУ-д сургуульд явж мэргэжлээ дээшлүүлж, боловсрол эзэмшээд олон сайхан компани байгуулж амжилттай явж байгаад баяртай байна. Монгол залуучуудын бүтээсэн ухаалаг утасны үзүүлэлт өндөр гоё юм байна. Үнэхээр бахархаж байна.  

“Hulan 21 Plus” ухаалаг гар утасны давуу талууд:

• Монгол хэл дээр бүрэн ашиглах боломжтой (23568 үг Монголоор хөрвүүлэгдсэн)
• Үйлдлийн систем Android 11 (хамгийн сүүлийн үеийн Version)
• Батарей 5400mAh (цэнэгээ удаан барина)
• Зураг дарахад баруун доод буланд “Hulan21 Plus” гэж гарч ирнэ
• Хамгийн их хэрэглэгддэг аппликэйшнууд утсан дээр суусан
• Дэлхийн ухаалаг утасны зах зээлд өрсөлдөхүйц үзүүлэлт, хүчин чадалтай

Г.Дугар