Өмгөөлөгчийнх нь хүсэлттэй холбогдуулан “Nissan” компанийн захирлуудын зөвлөлийн гишүүн асан Грег Келлиг Токиогийн тойргийн шүүх батлан даалтаар суллах шийдвэрийг өнөөдөр гаргажээ. Харин Келлитэй ижил хэргээр баривчлагдан саатуулагдсан “Renault - Nissan – Mitsubishi” нэгдлийн тэргүүн асан Карлос Гоныг суллаагүй байгаа аж.
К.Гон болон Г.Келли нарыг баривчлан саатуулах хугацааг 12 дугаар сарын 21-ноос хойш 10 өдрөөр сунгах прокурорын хүсэлтийг Токиогийн тойргийн шүүх хүчингүй болгосон юм. Японы шүүхийн байгууллагууд иймэрхүү хүсэлтээс татгалзах явдал маш ховор тохиолддог аж. Гэсэн хэдий ч Токиогийн прокурорын газар К.Гоныг дахин баривчилсан юм. Түүнийг 1,8 тэрбум орчим иен бүхий санхүүгийн үйл ажиллагаанаас гарсан хувийн алдагдлаа компани руу шилжүүлсэн байж магадгүй гэж үзэж байгаатай холбогдуулан дахин буруутгасан байна.
К.Гон, Г.Келли нарыг Японы санхүүгийн хууль тогтоомжийг зөрчсөн хэрэгт сэжиглэн өнгөрсөн сарын 19-нд баривчлан саатуулсан юм. К.Гоныг Г.Келлигийн дэмжлэгтэйгээр ашиг орлогоо нуун дарагдуулсан байж магадгүй гэж үзжээ.
Сэтгэгдэл бичих хэсэг