Ши Жиньпинийг "APEC"-ийн дээд хэмжээний уулзалтад урьжээ

Өмнөд Солонгосын ерөнхийлөгч Ли Жэ Мён Хятадын дарга Ши Жиньпинтэй анх удаа утсаар ярьжээ. Хоёр улсын удирдагчид Өмнөд Солонгос, Хятадын стратегийн түншлэлийг цаашид улам гүнзгийрүүлэн ажиллахаа онцлон тэмдэглэжээ. Мөн Ли Жэ Мён Хятадын дарга Ши Жиньпинийг энэ оны сүүлээр Өмнөд Солонгост болох Ази Номхон далайн эдийн засгийн хамтын ажиллагааны (APEC) дээд хэмжээний уулзалтад урив.

Хэрвээ Ши Жиньпин "APEC"-ийн дээд хэмжээний уулзалтад оролцвол Хятадын даргын Өмнөд Солонгос дахь 11 жилийн дараах анхны айлчлал болно.

Ли Жэ Мён албан тушаалаа хүлээж авснаас хойш ийнхүү АНУ-ын ерөнхийлөгч Дональд Трамп, Японы ерөнхий сайд Шигэрү Ишиба, Хятадын дарга Ши Жиньпин нартай утсаар яриад байна.

Өмнөд Солонгос улс АНУ-тай эвслээ бэхжүүлэхийг чухалчилдаг ч гэлээ хамгийн том худалдааны түнш Хятадыг мартаж болохгүй. Хятад бол Өмнөд Солонгосын хувьд эдийн засгаа тогтвортой байлгахад туслах стратегийн чухал ач холбогдолтой түнш.

30 минут үргэлжилсэн ярианы үеэр Ши Жиньпин Лид сонгуульд ялалт байгуулсанд нь баяр хүргэж, Хятад улс стратегийн түншлэлийн хүрээнд хоёр талын хамтын ажиллагааг цаашид хөгжүүлэх хүсэлтэй байгааг илэрхийлжээ.

Дашрамд дурдахад, энэ жилийн "APEC"-ийн дээд хэмжээний уулзалт Хойд Кёнсан мужийн Кёнжү хотноо аравдугаар сарын сүүлчээр зохион байгуулагдана. Харин ирэх оны уулзалтыг Хятад улс зохион байгуулах болжээ.