Л.Энх-Амгалан: Сурагчдыг 12-р сарын 18-наас хоёрдугаар сарын 3-ныг хүртэл амраана

Өнөөдөр Засгийн газрын хуралдаанаар 16 асуудал хэлэлцсэн. Улмаар гарсан шийдвэр болоод хэлэлцсэн асуудлын талаар  мэдээлэл хийж байна.

БШУ-ны сайд Л.Энх-Амгалан цаг үеийн асуудлаар мэдээлэл хийлээ.

Тодруулбал, “Өнөөдрийн Засгийн газрын хуралдаанаар бүх шатны сургалтын байгууллагын улирлын амралтын талаар мэдээлэл хийсэн. Бид дахин эрсдэлийн үнэлгээ хийхээр болсон.

Энэ сарын 18-наас сурагчдын амралт эхэлнэ. 12 хүртэл танхимаар, үлдсэн хугацаанд цахимаар хийгээд хичээлээ амраая гэдэг чиглэл барьж байна. Амралтыг наашлуулахгүй, цагтаа эхэлнэ. Гэхдээ тодорхой эрсдэлүүд байна. Томууны дэгдэлт, өвчлөл өдөр ирэх тусам ихэсч байна. Гуравдугаар тунд иргэдийг хамруулах шаардлага байна. Омикрон мутац дэгдэх аюул бий.
Иймд эрсдэл хэзээ ч үүсэж болно.

Их, дээд сургуулиуд арванхоёрдугаар сарын 10 хүртэл оюутнуудыг гуравдугаар тунд хамруулах ажлыг анхаарч ажиллая. Иймд арванхоёрдугаар сарын 10-наас хойших шалгалтыг цахимаар. Танхимаар шалгалтыг хоёрдугаар сараас хойш зохион байгуулахаар боллоо.

Цэцэрлэг арванхоёрдугаар сарын 10-наас хойш цагаан сар хүртэл түр танхимын бус сургалт хийж магадгүй байна ” гэлээ.

 Х.Соёл