"Хангайн цом 2021” яруу найргийн наадамд зохиолч М.Амархүү түрүүллээ

    Халхын анхдугаар Зая бандида, билгүүн номч, соён гэгээрүүлэгч, яруу найрагч Сунтарын Лувсанпринлэй хутагтын мэндэлсний 380 жилийн ойг угтан энэ жилийн “Хангайн цом 2021” яруу найргийн наадмыг Цэцэрлэг хотноо энэ сарын 29-ний өдөр Ардын жүжигчин Д.Ичинхорлоогийн нэрэмжит аймгийн ХДТ-т зохион байгууллаа.

Сунтарын Лувсанпринлэй хутагтын нэрэмжит “Хангайн цом 2021” яруу найргийн наадамд 70 гаруй найрагч шүлгээ бүртгүүлж уралдсанаас яруу найргийн тайзнаа 20 яруу найрагч шүлгээ уншсан юм. Ийнхүү яруу найргийн тэмцээнд МЗЭ-ийн болон Монголын Урчуудын эвлэлийн шагналт зохиолч Мягмарын Амархүү тэргүүлж, өргөмжлөл мөнгөн шагналаар шагнууллаа.

Эл наадам нь Монголын уран зохиолыг дэлгэрүүлэх, яруу найрагчдын бүтээлийг олон түмэнд таниулах, уншигч зохиолчдыг холбох, орон нутгийн иргэд, хүүхэд залууст утга зохиолын гоо сайхныг мэдрүүлэх, шинэ авьяастныг нээн илрүүлэх, сум орон нутгаа сурталчлах, яруу найрагч уран бүтээлчдийн харилцаа холбоог бэхжүүлэх зорилго агуулдаг .

Тус наадмын ерөнхий зохион байгуулагчаар  Архангай аймгийн утга зохиолын “ХАНТАМИР” төв, Архангай аймгийн болон Эрдэнэбулган сумын ЗДТГ оролцсон бол  С.Жамьянгаравын нэрэмжит аймгийн Нийтийн номын сан, "Номын соёлт ертөнц" ТББ, Архангай аймгийн Соёлын хэлтэс, МЗЭ-ийн Яруу найргийн үндэсний төв хамтран ажилласан байна. 

Эх сурвалж: Монцамэ.мн