АНД Глобал компани технологид суурилсан дижитал клиник Клиника платформд хөрөнгө орууллаа

АНД Глобал компанийн үүсгэн байгуулагч, ерөнхийлөгч Ч.Анар нь Монгол ТВ телевизийн 3 дахь жилдээ зохион байгуулж буй Шарк Танк нэвтрүүлэгт шарк буюу хөрөнгө оруулагчаар оролцож, тус нэвтрүүлгийн оролцогч Клиника телемедицин платформд Д.Энхтүвшин шаркын хамтаар хөрөнгө оруулахаар тохиролцсон билээ. Ийнхүү АНД Глобал компанийн гүйцэтгэх захирал Б.Хос-Эрдэнэ, Клиника платформыг төлөөлөн гүйцэтгэх захирал Д.Баасандорж, шарк Д.Энхтүвшин нар Хөрөнгө оруулалтын гэрээнд гарын үсэг зурлаа.

Шарк танк нэвтрүүлэг нь оргилуун их хүсэл тэмүүлэлтэй бизнес эрхлэгчдэд мөрөөдлөө биелүүлэх, санхүүжилтээ бий болгох боломжийг олгож, шаркуудын хувьд бизнесийн салбар дахь туршлага, мэдлэгээ шинэ, өсч буй бизнесүүдтэй хуваалцан хөрөнгө оруулалтаар дэмжих нөхцөлийг бүрдүүлж буй бизнесийн реалити шоу юм.

Клиника платформ нь Монгол Улсад эрүүл мэндийн салбарын үйлчилгээг сайжруулах, хүртээмжийг нэмэгдүүлэх зорилгоор олон улсын жишигт нийцсэн телемедицин үйлчилгээг нэвтрүүлж байгаа ба “Гарт багтах дижитал клиник” уриатай Клиника гар утасны аппликейшн нь эрүүл мэндийн үзлэг, үйлчилгээг байгаа газраасаа түргэн шуурхай, амар хялбараар авах боломжийг хэрэглэгчиддээ олгож буйгаараа онцлогтой.

АНД Глобал компани нь Монгол оюунаар бүтсэн технологийн шийдлүүдийг дэлхийд хүлээн зөвшөөрүүлэх зорилгынхоо хүрээнд Клиника платформыг хөгжүүлэгч компанид хөрөнгө оруулалт хийх гэрээг үзэглэн хамтран ажиллахаар болж байна.

АНД Глобал компанийн тухай

АНД Глобал компани нь 2017 онд үүсгэн байгуулагдсан ба Монголын анхны хиймэл оюун ухаанд суурилсан санхүүгийн үйлчилгээ үзүүлэгч ЛэндМН аппликейшнийг нэвтрүүлж дотоодын зах зээл дэх үйл ажиллагаагаа эхлүүлсэн. Түүнчлэн технологид суурилсан санхүүгийн болон бусад үйлчилгээг өөрсдийн ноу-хауд тулгуурлан Филиппин болон дэлхийн бусад орнуудад нийлүүлэн бизнесийн үйл ажиллагаагаа амжилттай тэлж байгаа шинэ үеийн Монгол технологийн компани юм.

http://and.global 

Клиника компанийн тухай

Асар Кейр ХХК нь 2020 оны 6-р сард үүсгэн байгуулагдсан ба Монголын анхны телемедицин буюу зайн эрүүл мэндийн үйлчилгээг 2021 оны 4-р сараас Клиника аппликейшнээр дамжуулан олон нийтэд хүргэж байна. Одоогоор нийт 26 чиглэлийн туршлагатай, нарийн мэргэшлийн лицензтэй 53 эмч, 19 эмнэлэгтэй хамтран Монгол улсын 21 аймаг, дэлхийн 26 улсад оршин сууж буй иргэдэд технологид суурилсан шийдлээр зайн эрүүл мэндийн үзлэгт хамрагдах боломжийг олгон ажиллаж байна.

www.clinica.mn