МАХН: Нөхөн сонгуулийг хойшлуулж Хэнтийн сонгогчдын эрх ашгийг зөрчиж байна
МАХН-аас Хэнтий аймагт болох нѳхѳн сонгуулийн талаар мэдээлэл хийлээ. Тэд мэдээллийнхээ үеэр, "Төр засгийн бүрэн эрх гагцхүү ард түмний гарт байна гэдэг нь Үндсэн хуулийн суурь зарчим мөн билээ. Тэгвэл энэхүү суурь зарчмыг баримтлан хэрэгжүүлэхийн тулд УИХ-ын 42-р тойрогт нөхөн сонгуулийг яаралтай зохион байгуулж Хэнтийн сонгогчдыг УИХ-д төлөөлөлтэй болгох нь зүй ёсны шаардлага мөн. УИХ-д өөрийн төлөөлөлгүй болоод удсан Хэнтийн сонгогчид ингэхийг хүлээж байгаа.
Гэтэл өнгөрсөн оны есдүгээр сарын сүүлээр болохоор товлогдоод байсан нөхөн Сонгуулийг МАН-ынхан 60 турбумын сүлжээгээр төрийн албанд шургалсан хүнийг дайчлан зохиомол өргөдлийг Үндсэн хуулийн цэцэд гаргуулж, нөхөн сонгуулийг хойшлуулж Хэнтийн сонгогчдын эрх ашгийг бүдүүлгээр зөрчсөн билээ.
Нөхөн сонгууль энэ оны зургадугаар сарын сүүлээр болохоор товлогдоод байж байтал энэ удаад АН-ынхан дахин Үндсэн хуулийн цэцэд зохиомол өргөдөл гаргуулж, нөхөн Сонгуулийг хойшлуулаад зогсохгүй бүр болгохгүй байх, тэр байтугай эмэгтэй хүн хүчирхийлсэн байж болзошгүй Д.Гантулгын УИХ-ын гишүүнийг сэргээлгэхийг хөөцөлдөж эхэллээ. АН-аас нэр дэвшиж Ерөнхийлөгчөөр сонгогдсон Х.Баттулгыг дэмжих сурталчилгаанд нь идэвхтэй оролцдог судлаач хэмээх Д.Ганхуяг ийм увайгүй үйл ажиллагаанд татагдан орсонд харамсаж байна.
Эдгээр үйл явдал МАН, АН хэмээх аймшигт бүтэц хэвээр байна гэсэн болгоомжлол үнэн болохыг нотолж байна. МАН ба АН-ынхан наанаа нэг нэгнийгээ шүүмжилж байгаа мэт дүр эсгэх авч цаагуураа нэг бол шударга бус сонгуулиар, эсхүл хууль шүүхийн байгууллагыг ашиглан эрх мэдлээ хадгалан авч үлдэхийн төлөө үгсэн хуйвалдаж шударга ёсыг нухчин дардаг зуршлаасаа салж чадахгүй, салахыг хүсэхгүй байгаа нь дахин батлагдлаа" гэдгийг онцлов.
Сэтгэгдэл бичих хэсэг