Г.Баттулга: Хамт хэвтэж байсан эмэгтэй нь ургийн бичлэг хийлгэх гээд явсан хойгуур цонхоо онгойлгоод үсэрсэн байна

ЭХЭМҮТ-д хэвтэн эмчлүүлж байсан 17 настай жирэмсэн эмэгтэй 6 давхрын цонхноос унаж амиа алдсан харамсалтай хэрэг өнгөрсөн шөнө гарсан. Тодруулбал, өчигдөр 22.50 цагийн үед ЭХЭМҮТ-ийн зургаан давхраас жирэмсэн эмэгтэй үсрэх гэж байсныг тухайн үед албан үүргээ гүйцэтгэж явсан цагдаа Н.Наянбаатар гарч, машиндаа байсан дээлээрээ тосч амь насыг нь аварсан юм. 

ЭХЭМҮТ-ийнхөн яаралтай тусламж үзүүлж, төрүүлэх арга хэмжээ авахад хүүхэд нь эндсэн байсан аж. Харин өөрөө гэмтэл авсан байсан учраас ГССҮТ-д хүргэжээ. Гэвч гэмтлээ даалгүй өнөөдөр 05.00 цагт нас баржээ. 

Болсон явдлын талаар ЭХЭМҮТ-ийн Эх барих эмэгтэйчүүдийн эмнэлгийн захирал АУ-ны доктор, Клиникийн профессор зөвлөх Г.Баттулгаас тодрууллаа. 

-Танай эмнэлэгт хэвтэж байсан жирэмсэн эмэгтэй цонхоор унасан харамсалтай хэрэг гарчээ. Болсон явдлын талаар тодруулахгүй юу? 

-Урд шөнө 17 настай А гэх жирэмсэн эмэгтэй манай эмнэлэгт ирж хэвтсэн. Түүний төрөх өвдөлт өчигдөр 16.55 цагаас эхэлсэн. Тухайн жирэмсэн эмэгтэй 39 долоо хоногтой ураг орчмын шингэн эрт гарсан гэсэн оноштойгоор төрөхийн өмнөх тасагт хэвтсэн эмчлүүлж хянагдаж байсан. Гэвч жирэмсэн эмэгтэй цонхоор үсэрсэн ийм золгүй явдал болоод байна. 

Тухайн үед доор нь цагдаа таарч, тосч аван унах хүчийг нь буулгаж, харьцангүй бага гэмтэл авсан байна лээ. Яаралтай тусламж үзүүлэн хүүхдийг төрүүлэхэд 3 кг 50 см амьгүй хүүхэд төрсөн. Харин эмэгтэйг ГССҮТ-ийн эмчийг дуудаж үзүүлсэн. Оюун ухаан болон орчны харьцаа хэвийн байсан. Гэсэн хэдий ч зургаан давхраас унасан дээрээс нь доргилт авсан учраас хүнд гэмтэж ГССҮТ-рүү хүргэгдсэн.

-Тухайн үед өрөөнд ямар нэг хүн байгаагүй юм уу?

-Нас барсан эмэгтэй жирэмсний хяналтанд бүрэн орж байсан. Онц анхаарал татах зүйл байгаагүй дүр зураг харагдаж байна. Тухайн нас барсан эмэгтэй төрөгч эхтэй нэг өрөөнд  хамт байсан. Хамт хэвтэн эмчлүүлж байсан эмэгтэй ургийн бичлэг хийлгэх гээд өөр өрөө рүү явсан хойгуур өөрөө цонхоо онгойлгоод үсэрсэн харамсалтай явдал болсон. 17 настай А-ын ар гэрийнхэн нь гэр лүүгээ явсан хойгуур ийм золгүй явдал болсон юм гэсэн тайлбар мэдээлэл өгөөд байгаа.