Д.Эрдэнэбат: Тухайн үед Монголын төрд Эрдэнэтийн 49 хувийг худалдаж авах 400 сая доллар байгаагүй

АН-ын бүлгийн дарга Д.Эрдэнэбат өнөөдөр Эрдэнэтийн 49 хувийг худалдан авсан гэх асуудлаар сэтгүүлчдийн сонирхсон асуултад хариуллаа. 

-Эрдэнэтийн 49 хувийг хувьчилсан асуудалд таны нэр дурдагдаад байна. Энэ талаар мэдээлэл өгөөч? 

-Засгийн газрын тэмдэглэлийг ил болгосон нь зөв. Аж үйлдвэрийн сайд байхдаа Эрдэнэтийн 49 хувийг хэлэлцүүлэхээр Засгийн газарт оруулсан миний бичиг байна. Засгийн газар дээр энэ асуудлыг хэлэлцсэн. Үүнд анхаарал татсан нэг зүйл нь юу гэвэл ОХУ-ын захирлын бичгийг монгол хэл дээр орчуулж хэвлээгүй байна. Асуудалд ингэж хандаж боломжгүй. Үүний орчуулгыг ЗГХЭГ-аас гаргах хэрэгтэй. Учир нь энэ бичигт яагаад энэ мөнгийг төрөөс гаргах боломжгүй болсон бэ гэдэг зүйлийн хариулт бий. Энэ бол өөрийнхөө эзэмшдэг 49 хувийг зарах саналтай байна гэдэг хандсан захидал. Үүнд нэг өгүүлбэр бий. Энэ хувьцааг зарахын тулд төлбөрийн хугацааг ажлын 12 хоногоос доошгүй хугацаанд гэж тогтоосон байгаа. Энэ 12 хоног бол хаалтын өдөр шүү гэсэн байдаг. Энэ бичиг Монгол Улсын Засгийн газарт ирсэн байдаг. Энэ бичиг хэзээ ирсэнийг Засгийн газар өөрсдөө шүүгээд олчих байх. Энэ ажлын 12 хоногийн хугацаанд ОХУ-ын зарах гэж байгаа 49 хувийг Монголын төр эрхзүйн шийдвэр гаргаж, 400 сая доллар босгохын тулд энэ хугацаанд багтаж чадах байсан уу үгүй юу гэдэг асуудал үүссэн. Ярихад амархан. Бид 400 сая доллар босгоод л авчих байсан ш дээ гэх байх. Ярих, хийхийн хооронд асар том зөрүү бий. Засгийн газар үүнийг хэлэлцээгүй биш. Ярьсан байдаг. Миний танилцуулганд санхүү эдийн засгийн хувьд төр өөрөө худалдаж авах боломжгүй нь үнэн юм байна гэж. Энэ 12 хоногийн хугацаанд амжихгүй. Яагаад гэхээр ээлжит чуулган завсарлачихсан. Би сайдын хувьд зарчим, бодлого хоёрыг барьсан. Нэгэнт төр худалдаж авах боломжгүй учраас Монгол Улсад 49 хувь нь орж ирэх нь зөв гэж үзсэн. Тиймээс ЗГ энэ шийдвэрийг гаргасан гэж үзэж байна. Энэ үйлдвэр 100 хувь монголын үйлдвэр болсон. Харин цаашдаа ажиллахдаа улстөрийн хэлээр биш, эдийн засгийн хэлээр ярьж ажиллаасай гэж хүсч байна. 

2016 онд Эрдэнэт үйлдвэр ОХУ-ын хувьцаатай байх үедээ 70 хэдхэн тэрбум төгрөгийн татвар улсад төлсөн байдаг. Харин 2018 онд энэ 9 дахин нэмэгдсэн. Тэгэхээр Монголын 100 хувь мэдэлд орсноор эдийн засгийн хувьд ашигтай болсон нь ойлгомжтой байна. 

-Төрд мөнгө байхгүй гэдгийг тайлбарлаад өгөхгүй юу? 

-Тухайн үед төрд 400 сая доллар байсан уу, үгүй юу гэвэл огт байгаагүй. Эдийн засгийн хүндрэлтэй үе байсан. Мөн ажлын 12 хоногийн дотор багтааж монголын төр ийм их хэмжээний мөнгийг босгож чадах байсан уу гэвэл чадахгүй байсан гэдгийг илэрхийлж байгаа. 

-Эрдэнэтийн 49 хувийг худалдан авахдаа мөнгө угаалт хийсэн гээд байгаа. Энэ талаар тайлбарлахгүй юу? 

-Санхүүгийн асуудлыг Засгийн газар шийддэггүй юм. Мөнгө угаалт гэж юуг хэлээд байгааг Олон Улсын хэлээр тайлбарлах байх. Санхүүгийн асуудлыг шүүх хяналтын байгууллага шийдэх ёстой. 

-Эрдэнэт үйлдвэрт онц дэглэм тогтоосныг юу гэж харж байна вэ? 

-Энэ бол Үндсэн хууль зөрчсөн асуудал.