Ө.Энхтүвшин: "ЭКО АЛТАН ЗААМАР"-ын осол газар хөдлөлтөөс болсон гэдэг тайлбар үнэмшилгүй байгаа

Шадар сайд Ө.Энхтүвшин "ЭКО АЛТАН ЗААМАР" ХХК-ийн ашигт малтмалын олборлолтын ил уурхайд болсон ослын талаар мэдээлэл өглөө. 

Тэрбээр "Хамгийн аюултай нь энэ уурхай ахиад нурах магадлалтай байна. Тиймээс аврагчдын тоог цөөлж, маш хянуур болгоомжтой ажиллаж байна"

Ингээд сэтгүүлчдийн сонирхсон асуултад хариуллаа. 

-Та газар дээр нь ажиллаад ирлээ. Нөхцөл байдал хэр байна? 

-Аврах ажиллагаа нэлээн олон хоног явагдаж байна. Өнөөдөр 7 дахь өдөр нь. Нөхцөл байдал их хүнд байна. Дөнгөж сая гурав дахь цогцсыг оллоо. Таниулах ажиллагаа явуулахаар цагдаагийн байгууллагад хүлээлгэн өгсөн. Энэ уурхайн хана аль ч талаасаа нурах магадлал өндөр. Эрэн хайх талбайтайгаа ойрхон байгаа хана ертөнцийн зүгээр урд зүгт байгаа. Тэр бол мөсжсөн том талбай байна лээ. Цаад сууриасаа хөндийрсэн байгаа нь харагдаж байна. Аврагчид усан дотор ажиллаж байна. 80 метрийн дор нуур шиг ус хуримтлагдсан байгаа. Түүнд аврагчид ажиллаж байна. Мөсөөр хучигдсан тийм л хүйтэн усанд аврагчид ажиллаж байна. Найман шумбагч 30-аад шумбалт хийж, цогцсуудыг гарган авч байна. Сүүлийн нэг цогцсыг олохыг ар гэрийнхэн нь ихэд шаардаж байна.  Аврагчид бүх боломжоороо өдөр шөнөгүй ажиллаж байна. Миний санаа зовж байгаа зүйл бол авран хайх ажиллагаа явуулж байгаа аврагчид амь насаа алдах вий. Нуранга үүсэх л юм бол тэр доор ажиллаж байгаа хүмүүсийг гаргах боломжгүй. Шанага шиг юманд л хүйтэн усанд шумбаад нэг орохдоо 20  минутаар шумбалт хийж байна. Хувцас их муутай байна. Цаашдаа үүнд анхаарна. 

Аврагчид үнэхээр сайн ажиллаж байна. 

-Осолдсон иргэдийн ар гэрийнхэн юу гэж байна? 

-Аврагчид маш сайн ажиллаж байна. Зохион байгуулалттай үнэхээр сайн байна. Гэхдээ зургаа хоночихлоо. Хүнийхээ барааг л хармаар байна. Хурдан гаргаж өгөөч гэж шаардаж байна. Тиймээс эрлийг зогсоох боломжгүй. Гэхдээ би сая Засгийн газрын хуралдаанд танилцуулсан. Засгийн газрын зүгээс аврах ажиллагаа явуулахдаа дээд зэргийн болгоомжтой, аюулгүй байдлыг хангаж ажиллаарай гэх үүргийг надад өгсөн. 

-Засгийн газраас ямар шийдвэр гаргасан бэ? 

-Энэ бол зөвхөн нэг компанид гарч байгаа осол биш. Хавар болж байна. 100 гаруй компани ажилдаа гарсан. Эдгээр компанид ч ийм осол гарахыг үгүйсгэхгүй. Тиймээс МХЕГ-аас шалгалтыг шуурхай хийж, бүх компанид шалгалт явуулах үүрэг өгсөн. Хэдийгээр Засгийн газраас сэрэмжлүүлэг хүргүүлж байсан ч ийм харамсалтай осол гарсан байна. Тиймээс шуурхай арга хэмжээ авч, шаардлага хангахгүй байгаа компаниудын үйл ажиллагааг зогсоох чиглэл өгсөн.

-Ослын газар компанийн удирдлагууд байгаа юу. Тэд юу гэж байх юм? 

-Яг ослын газар компанийн хувьцаа эзэмшигч хүмүүс байна лээ. Яг компанийн захирал нь Төмөрцэцэг гэж хүн байгаа. Бие нь муу байгаа гэж бидэнд хэлсэн. Тэр Төмөрцэцэгийн төрсөн ах нь гээд нэг хүн байна лээ. Компанийн хувьцаа эзэмшигч гэж танилцуулсан. Гүйцэтгэх захирлын орлогч нар тэнд байсан. Одоогийн байдлаар ослын газар техник, хүн хүчээ гаргаад ажиллаж байгаа. Ослын шалтгаан өнөөдөр гарчих байх. Хариуцлагын асуудал зайлшгүй яригдана. 

-Өмнө нь мөн энэ компанид нэг хүний амь нас эрсдэж байсан юм билээ? 

-Тэр мэдээллийг авсан. Техникээс үзүүртэй төмөр харваад амин газарт нь оносон гэсэн. Тэгэхээр энэ компанид хоёр ч удаа осол гарлаа. Тиймээс энэ компанийн хувьд компанийг удирдаж байгаа хүмүүсийг хувьд заавал хариуцлагаа хүлээнэ. 

-Компанийн зүгээс газар хөдлөлтөөс болсон гэж тайлбарлаад байна. Энэ хэр үндэслэлтэй вэ? 

-Газар хөдлөлт болсон уу үгүй юу гэдэг дээр тухайн компани өөрсдөө магадлагаа авсан юм билээ. Тэрийгээ бидэнд үзүүлсэн. Тэр цаасан дээр 2019 оны хоёрдугаар сарын 27-ны өдрийн 22.30 байна уу 40 минутын үед уурхайн кординат газарт 4 магнутын хүчтэй хөдлөлт болсон байна гэдэг дүгнэлт байна лээ. Гэхдээ осол болсон цаг хугацаа нь маргааш өдрийн буюу хоёрдугаар сарын 28-ны өдрийн 16.00 цагийн орчим болсон. Тэгэхээр газар хөдлөөд нурсан гэдэг тайлбар бол үнэмшилгүй байгаа юм. Харин нуралт болсон талбайн дээхэн талд хэд хэдэн усан сан байгуулсан байна лээ. Тэр усан сангийн ус тэр газар судлаар явж нэвчилт үүсгэсэн байна уу, нуралт үүсгэсэн байна уу гэдгийг мэргэжлийн хяналтын байгууллага шалгаж тогтооно.