НМХГ-аас хаах шийдвэр гарсан ч KFC-гийн Зайсангаас бусад бүх салбар ажиллаж байна

Цагаан сарын баярын өдрүүдэд Зайсангийн KFC салбараар үйлчлүүлсэн иргэд хордож, ХӨСҮТ-д эмчлүүлж байгаа юм. Тодруулбал, хоёрдугаар сарын 8-15-ны өдрүүдэд “Зайсан KFC” түргэн хоолны газраас хоол идсэн 116 хүнд ойр ойрхон усархаг гүйлгэх, зарим хүнд бөөлжих, халуурах зэрэг эмнэлзүйн ижил шинж тэмдэг илэрч ХӨСҮТ-д хэвтэн эмчлүүлж байгаа 37, гэрээр эмчийн зөвлөгөөний дагуу эмчлүүлж байгаа 79 хүнд хоолны хордлогот халдварын ижил эмнэлзүйн шинж тэмдэг илэрсэн.

Үүнтэй холбогдуулан, Нийслэлийн мэргэжлийн хяналтын газар, Халдварт өвчин судлалын үндэсний төвийнхөн тус газарт ажиллаж, 39 төрлийн хоолны дээж, 41 нэр төрлийн хүнсний түүхий эд бүтээгдэхүүн, ундны усны 2, агаарын 5 сорьц, 4 ундааны сорьц авч лабораторид нян судлалын шинжилгээнд хамруулсан байна. Шинжилгээгээр сүлжээ рестораны ахуйн хэрэгцээнд ашигладаг худгийн уснаас халуунд тэсвэртэй гэдэсний нян илэрсэн. Мөн ундаа нь шаардлага хангаагүй. “Зайсан KFC” салбарын гал тогоонд ажиллаж байсан хоёр хүнээс шигел төрлийн хоолны хордлогот халдвар илэрчээ.

Энэ талаар өчигдөр өглөө болсон Нийслэлийн удирдах ажилтнуудын шуурхай хурал дээр НМХГ-ын дарга Л.Эрдэнэчулуун "Манай газарт энэ сарын 11-ний өдөр дуудлага ирж, 12-ний өдөр “Зайсан KFC” түргэн хоолны газрыг хаасан байгаа. Харин өнөөдрөөс тус түргэн хоолны газрын бүх салбарыг хаахаар болсон. Мөн бүтээгдэхүүнийг устгах ажиллагаа явагдах болно” гэсэн юм. 

Тодруулбал, НМХГ-аас энэ сарын 18-21-ны хооронд KFC салбаруудад шалгалт явуулах аж. Үүнтэй холбогдуулан, Нийслэлд үйл ажиллагаа явуулж байгаа KFC-гийн бүх салбарыг прокурорын зөвшөөрөлтэйгээр түр хугацаанд хаахаар болсон байна. Одоогоор хэзээ нээгдэх нь тодорхойгүй байгаа бөгөөд шалгалт дуусч, шинжилгээний хариу бүрэн гарсаны дараа нээх эсэх нь тодорхой болох аж. Хэрэв эрхийг нь цуцалж, үйл ажиллагааг нь зогсоохоор бол шүүхийн шийдвэрээр цуцалдаг юм байна. 

Тэгвэл НМХГ-ын дарга Л.Эрдэнэчулуун өнөөдрөөс (өчигдрөөс) эхлэн бүх салбарыг хаана гэж мэдэгдсэн нь хэрхэн биелэлээ олж байгаа эсэх талаар хотын төвд байрлах гурван салбарт очлоо. Бидний очсон салбарууд бүгд үйл ажиллагаагаа хэвийн явуулж байсан ч бараг хүнгүй шахам байсан юм. Нэг салбараар хамгийн ихдээ 8 хүн, хамгийн бага нь 4 хүн үйлчлүүлж байсны дийлэнх нь найз нөхдөөрөө явж байгаа оюутан, сурагчид байлаа.

Тодруулбал, биднийг 16.00 цагийн орчимд Төв номын сангийн замын эсрэг талд байрлах салбарт очиход үйл ажиллагаа нь хэвийн үргэлжилж байсан бөгөөд нийтдээ найман хүн үйлчлүүлж байсан юм.

Харин дараа нь бид энгийн үед хөл гишгэх зайгүй шахам байдаг хүүхдийн 100-гийн салбарт очсон юм. Мөн л адил үйл ажиллагаагаа хэвийн явуулж байсан ч хүнгүй шахам байлаа.

Хамгийн сүүлд бид Тэнгис кино театрын урд талд байрлах салбарт нь очсон юм. Тус салбараар гурван хүүхэд, хоёр том хүн нийт таван хүн л үйлчлүүлж байсан юм.

НМХГ-аас тодруулахад "Өнөөдрөөс эхэлж бүгдийг нь албан ёсоор хаах болно" гэж хариулж байсан ч өнөөдрийн байдлаар KFC-гийн Зайсангаас бусад бүх салбар хэвийн ажиллаж байгаа хэмээн мэдэгдлээ.