АТГ: 60 тэрбумын хэргийн нотлох баримтыг өөрчлөөгүй

Өнөөдөр АТГ-аас цаг үеийн асуудлаар мэдээлэл хийх үед АТГ-ын Мөрдөн шалгах хэлтсийн дарга Э.Идэрцог 60 тэрбумын гэх асуудлаар сэтгүүлчийн асуултанд хариуллаа.

Тэрээр “өчигдөр иргэн Г.Доржзодов ганц нэг зүйл дээр ташаа мэдээлэл өгсөн. Хэргийг хаана шалгах, хэрхэн шийдэх, хэрэг нээх, хаах, хүнийг яллагдагчаар татах, харьяалал тогтоох нь бүхэлдээ прокурорын хэнтэй ч хуваалцахгүй эрхийн асуудал. Энэ утгаараа 60 тэрбумын хэрэг дээр прокуророос өгсөн чиглэлийн дагуу АТГ-аас ажлын хэсгийг ахалж, шалгасан. Ингээд мөрдөх чиглэлийн байгууллагуудын хийсэн ажиллагаанд прокурор өөрөө  эцсийн дүгнэлт хийж, хаасан. Сая дахин сэргээж, урьд нь хариуцаж байсан ажлын хэсэгт хэргийг даалгасан. Түүнээс АТГ дурандаа хэргийг татаж аваад, хэсэг бүлэг хүмүүсийг хайцаалсан зүйл байхгүй. Тагнуулын байгууллага дээр ирсэн мэдээллийн хүрээнд ажлын хэсэг мөрдөн шалгах үйл ажиллагааг явуулж байгаа.

Анх 2016 онд хэрэг үүсэхэд  дуу дүрсний материалууд зэрэг хавсрагдаад  АТГ, Цагдаагийн байгууллагуудад ирсэн. Эдгээр ирсэн материалуудыг АТГ шүүхийн шинжилгээнд хүргүүлсэн.  Г.Доржзодовын хэлсэн шиг хуурамч нотлох баримт үйлдээд, флаш нэмээд явуулсан асуудал байхгүй. Аль нэг талаас ирүүлсэн баримтыг л хавсаргасан гэсэн үг.

Энэ үед 2 минут, 2 минут, 45 орчим минутын бичлэгүүд яригдаж байсан. Сүүлд 2017 оны Ерөнхийлөгчийн сонгуулийн үед 90 минут, 162 минут болоод үргэлжилсэн байсан. Эхний бичлэгүүдийн хувьд эвлүүлэг байна гэсэн дүгнэлт, шинжилгээ ерөөсөө гараагүй. Анхны шинжилгээнд ирүүлсэн материалууд дээр фото зураг болон текст, аудио эвлүүлснийг эвлүүлэг байна гэж шинжилгээний байгууллага үзсэн. Сүүлд 162 минутын бичлэг гарч ирэхэд үүнээс өөр бичлэг байхгүй гэдгээ Г.Доржзодов хэлсэн. Түүнээс шүүхийн шинжилгээний байгууллага хүний дуу хоолой, өөр өөр дүрс эвлүүлсэн гэсэн дүгнэлт ердөө гаргаагүй. Тэр уулзалтыг огт болоогүй гэж үзээгүй. Тухайн уулзлат дээр яригдсан зүйл хэрэгжсэн үү гэдэг дээр хэн нэгэн хүнийг яллагдагчаар татах хууль эрх зүйн орчин байхгүй байна. Өөрөөр хэлбэл ярьсан ярианы төлөө яллагдагчаар татах нотлох баримт цугларсангүй гэж үзээд прокурорын байгууллага хаасан байдаг.

Бичлэгэн дээр яригдаж буй хүмүүсийн дуу хоолойг харьцуулж шалгахын тулд анх бичлэг хийсэн төхөөрөмжийн эх хувь хэрэгтэй байдаг. Өчигдөр иргэн Г.Доржзодовын ярьсан төхөөрөмжүүдийг шалгахад дотор нь ямар нэгэн дуу дүрсний мэдээлэл байгаагүй. Гадаадад хийсэн шинжилгээний дүгнэлт дээр 3 хүний дуу авиа байна гэж дүгнэсэн байдаг. Манайд хийсэн мөрдөн шалгах ажиллагааны дүгнэлтээр 5 хүн байсан нь нотлогдсон. Иргэн Г.Доржзодов ТЕГ-т хэд хэдэн удаа байцаалт өгсөн. Харин АТГ-т байцаалт өгөөгүй” гэлээ.

Үүнээс үзвэл иргэн Доржзодов хэн нэгний заавраар худлаа мэдээлэл тарааж буй нь илт байна.