Хэнтий аймаг 2018 оныг “Гэр бүлийн хөгжлийг дэмжих жил” болгон зарлаж, сар бүр өрх гэрлүү чиглэсэн томоохон ажлуудыг санаачлан хийж байгаагийн нэг нь төрийн үйлчилгээг багт хүргэх явдал юм.
Энэ ажлын хүрээнд тус аймгийн ИТХ-ын дарга Л.Батсайхан, Засаг дарга Н.Ганбямба, Засаг даргын орлогч Ц.Чогсомжав, Г.Хэрлэнчулуун нараар ахлуулсан хоёр ээлжийн ажлын хэсэг 18 сумын 88 багт хүрч, иргэдтэй уулзан, санал хүсэлтийг нь сонсохын зэрэгцээ шаардлагатай асуудлуудыг газар дээр нь шийдвэрлэжээ.
Энэ үеэрээ эрүүл мэнд, нийгмийн даатгал, улсын бүртгэл, газрын харилцаа, байгаль орчин, хөдөлмөр халамжийн чиглэлийн үйлчилгээг хүргэж ажилласан байна. Мөн орон нутагт хийгдэж буй бүтээн байгуулалтын ажилтай танилцаж, төр засгийн бодлого шийдвэрийн талаар иргэдэд мэдээ мэдээлэл өгчээ.
Ийнхүү Хэнтий аймгийн удирдлагуудаар ахлуулсан таван ажлын хэсэг 5000 гаруй км зам туулж, малчин зон олныхоо хотонд очиж, айл өрхөөр орж аж байдалтай нь танилцан, 20 000 гаруй иргэдтэй уулзаж, 10000 гаруй иргэдэд төрийн үйлчилгээг хүргээд байна.
“Төрийн үйлчилгээг багт” хүргэх ажилд иргэд идэвхтэй оролцож, дахин ирүүлэхийг хүссэн тул тус аймгийн ЗДТГ-аас ирэх есдүгээр сард удирдлагуудаар ахлуулсан ажлын хэсэг 88 багийн иргэдийг дахин зорихоор төлөвлөөд байна.
Сэтгэгдэл бичих хэсэг