"Өлгийн хүчтэн"-үүд наадмын бэлтгэлд ирэх сарын 10-наас гарна

Баян-Өлгий аймгийн "Өлгийн хүчтэн" дэвжээний удирдах зөвлөл өчигдөр ээлжит хуралдаанаа хийж, бөхчүүдийг наадмын бэлтгэлд ирэх сарын 10-наас гаргахаар шийдвэрлэжээ.

Тэрбээр Төв аймгийн Эрдэнэ сумын нутагт байрлах "Харзтай" амралтын газарт "Увс нуур" бөхийн дэвжээний хажууд бэлтгэлээ базаах аж.

Тус аймгийн бөхчүүдийн хувьд гурав дахь жилдээ тусдаа гал болж гарч байгаа бөгөөд улсын начин Б.Баатарцол, Б.Серикээр ахлуулсан 30 гаруй бөх бэлтгэл хийхээр болжээ. Харин улсын харцага О.Бахыт, аймгийн хурц арслан К.Ханат нар дасгалжуулагчаар ажиллах юм.

"Бөхчүүд маань өнгөрсөн наадмаас хойших томоохон болон залны барилдаануудад одтой сайхан барилдаж, дээгүүр амжилт үзүүлсэн. Энэ жилийн наадмаар улсын цолтой бөхчүүдийнхээ амжилтыг улам ахиулж, шинээр улсын цолтон төрүүлэх, аймаг, цэргийн цолтой бөхчүүдийнхээ тоог нэмэх зорилт дэвшүүлэн ажиллаж байгаа" гэдгийг дэвжээний тэргүүн, аймгийн арслан Х.Айдос илэрхийллээ.

2016, 2017 оны наадмын барилдаануудад Б.Баатарцол, Б.Серик нар Баян-Өлгий аймагт сүүлийн 34 жил тасраад байсан улсын цолыг хүртсэн юм.  Харин энэ жил ард түмэн аймгийн хурц арслан У.Береке, аймгийн арслан М.Еркебулан, Н.Мустафа нар улсын цолонд хүрнэ хэмээн итгэл хүлээлгэж байна.