Хэрвээ Ираны эсрэг хоригоо зогсоох тухай шийдвэрээ АНУ-ын Ерөнхийлөгч Д.Трамп ирэх 5 дугаар сард сунгахгүй бол Иран улс цөмийн хөтөлбөрөө сэргээнэ. Ийм мэдэгдлийг Ираны Гадаад хэргийн сайд Мохаммад Жавад Зариф телевизийн СВS сувагт ярилцлага өгөхдөө хийлээ.
“Ерөнхийлөгч Трамп албан тушаалдаа орсноосоо хойш Венийн хэлэлцээрийг сахин мөрдөж байгаагүй. Хэлэлцээрийн ачаар эдийн засгийн ашиг олох боломжийг Иран улсад олгохгүйн тулд Д.Трамп болон түүний засаг захиргааны зүгээс бүхий л аргыг хэрэглэсээр ирсэн” гэж Ираны сайд хэлсэн байна.
Сануулан дурдахад, 2015 оны 6 дугаар сард НҮБ-ын Аюулгүй Зөвлөлийн байнгын гишүүн ОХУ, Их Британи, БНХАУ, АНУ, Франц улс болон ХБНГУ, түүнчлэн Иран улс Ираны цөмийн хөтөлбөрийн асуудлыг зохицуулах тухай гэрээг байгуулсан билээ. Үйл ажиллагааны хамтарсан цогц төлөвлөгөө хэмээх уг гэрээ ёсоор НҮБ, АНУ болон Европын Холбооны зүгээс Ираны эсрэг авсан хориг арга хэмжээг цуцалсан юм.
Харин Д.Трампын үзэж байгаагаар “уг гэрээ нь Иран улс цөмийн зэвсэгтэй болох боломжийг хаагаагүй, цөмийн зэвсэгтэй болох өдрийг л хойшлуулсан” ажээ. Энэ оны 1 дүгээр сарын 12-ны өдөр Цагаан ордны тэргүүн мэдэгдэхдээ “хэрвээ гэрээнд өөрчлөлт оруулахгүй бол АНУ гэрээнээс гарна” гэсэн юм.
Америкийн хуульд зааснаар, Ираны эсрэг хоригийг түр цуцлах тухай шийдвэрийг сунгах эсэхээ Ерөнхийлөгч Д.Трамп 5 дугаар сарын 12-ны өдөр шийдэх ёстой. Хэрвээ тэрбээр сунгах шийдвэр гаргахгүй бол Ираны эсрэг хориг автоматаар сэргэх юм.
Сэтгэгдэл бичих хэсэг